അപരാധി

ലകഷ്യമില്ലാതെക്കിതച്ചു നീങ്ങുന്നൊരെന്‍  

തോഴരേ ഞാന്‍ ചെയ്ത തെറ്റെന്ത്, ചൊല്ലുമോ ?

എന്തിനെന്നോരാതെ മന്നില്‍ പിറന്നതോ, 

കണ്ണീരൊഴുക്കിക്കവിള്‍കള്‍ കുതിര്‍ത്തതോ,

ആദിവെണ്‍വെട്ടമെന്‍ കണ്ണിലേയ്ക്കിറ്റിയ്ക്കു-

മാദിത്യനോടും പിണങ്ങിക്കരഞ്ഞതോ ?

തൊട്ടിലില്‍ മെല്ലെച്ചിണുങ്ങിക്കരഞ്ഞു കൊ-

ണ്ടമ്മയെ താരാട്ടുപാട്ടു പാടിച്ചതോ, 

ആദ്യാക്ഷരങ്ങളെന്‍ നാവില്‍ പിറക്കവേ

ആചാര്യഹസ്തം രസിച്ചു നുകര്‍ന്നതോ  ?

അക്കങ്ങളെണ്ണിപ്പഠിക്കാതെയക്കര-

പ്പച്ചയ്ക്കു വേണ്ടി ഞാനെങ്ങോ തെരഞ്ഞതോ,

അര്‍ത്ഥങ്ങളെല്ലാമനര്‍ത്ഥമാകുന്നതോ 

അക്ഷരം പാഥേയമാക്കിയുണ്ണുന്നതോ ?

സ്നേഹത്തിനര്‍ത്ഥം തിരിച്ചറിയാഞ്ഞതോ   

മോഹങ്ങള്‍ ഹോമിച്ചു ജീവന്‍ പടുത്തതോ,

പുഞ്ചിരി പോലും മുഖത്തുറയ്ക്കാത്തതോ

സങ്കടം പങ്കിടാനാരുമില്ലാത്തതോ ?

ആദ്യാനുരാഗത്തിലന്ധനായ് ഞാനെന്റെ

തോഴിയ്ക്കു ഹൃത്തകം പാതി കൊടുത്തതോ,

മാംസം ഭുജിയ്ക്കും കഴുകിനെക്കൊന്നതോ 

നഗ്നസത്യങ്ങള്‍ ഉറക്കെപ്പറഞ്ഞതോ   ?

ലകഷ്യമില്ലാതെക്കിതച്ചു നീങ്ങുന്നൊരെന്‍  

തോഴരേ ഞാന്‍ ചെയ്ത തെറ്റെന്ത്, ചൊല്ലുമോ ?