കവിതാലോകത്തെ സുഹൃത്തുക്കളോട്

നേരുണ്ട്, നെറിയുണ്ട്, നോവുണ്ട്, നീറ്റലു-

ണ്ടെന്നുള്ളിലാളുന്നൊരഗ്നിയുണ്ട്

നീയുണ്ട്, ഞാനുണ്ട്, നമ്മുടെ നെഞ്ചിലി-

ത്തീയിലും വാടാത്ത നന്മയുണ്ട്

എതുഗ്രമൂര്ത്തിയ്ക്കുമേതു കാട്ടാളനും

കീഴടങ്ങീടാത്തൊരുണ്മയുണ്ട്

കാറുണ്ട്, മഴയുണ്ട്, ചിന്തയില്‍ പൂവിട്ട

കാവ്യമാം തീരാ വസന്തമുണ്ട്

മഞ്ഞിന്‍ കുളുര്‍മയും, കാറ്റിന്റെ താളവും

തൊട്ടറിഞ്ഞീടും  മനസ്സുമുണ്ട് 

ഏതോ കിനാപ്പക്ഷി പാടുന്ന പാട്ടിന്റെ-

യീണങ്ങള്‍ തൂലികത്തുമ്പിലുണ്ട്  

തെല്ലും ദഹിയ്ക്കാത്ത കള്ളങ്ങള്‍ കേള്‍ക്കുമ്പൊ-

ളുള്ളില്‍ തിളയ്ക്കുന്ന രക്തമുണ്ട്

തൊട്ടടുത്തുള്ളം തപിയ്ക്കുന്ന തോഴരെ-

ത്തൊട്ടിരുന്നീടുവാന്‍ വെമ്പലുണ്ട്.

സത്യവും നീതിയും വാഴുന്ന ലോകത്തെ

സ്വപ്നത്തിലെന്നും നിനയ്ക്കലുണ്ട്

എങ്കിലും  രാവിന്നിരുട്ടിലെന്നുണ്ണിയെ

ഒറ്റയ്ക്കയയ്ക്കുവാന്‍ പേടിയുണ്ട് 

എങ്കിലും ഞാനറിഞ്ഞീടുന്നു നേരുള്ള

കാവ്യങ്ങള്‍ തീര്‍ത്തു നീ കൂടെയുണ്ട്

സോദരാ, കാവ്യം രചിച്ചു നീ പാടുക,

കൂടെയെന്‍ പാട്ടുമായ് ഞാനുമുണ്ട് !