Thursday, October 3, 2013

ഒരു പക്ഷേ അയാള്‍ക്ക്
നിങ്ങളുടെ മുത്തച്ഛന്റെ
പ്രായമുണ്ടാകും.

എജന്സി നല്കിയ ലാത്തി
ഊന്നുവടിയാക്കി
അയാളിപ്പോള്‍
എ.ടി.എമ്മിനരികില്‍
ഉലാത്തുകയായിരിക്കും.

പിന്നിത്തുടങ്ങിയ നീല ഷര്‍ട്ടും
ഇറക്കം കൂടിയതിനാല്‍
മടക്കിവയ്ക്കപ്പെട്ട കറുത്ത പാന്റും
നിങ്ങളുടെ മുത്തച്ഛനെന്ന പോലെ
അയാള്‍ക്കും തീരെ ചേരുന്നില്ല.

പാതിരാവിലെപ്പോഴെങ്കിലും
ഏതെങ്കിലും ഒരു പതിനഞ്ചുകാരന്‍
മനസ്സറിഞ്ഞു കയര്‍ത്താല്‍
പാവം നിങ്ങളുടെ മുത്തച്ഛനെന്ന പോലെ
അയാളും ബോധമറ്റു വീണുപോയേക്കാം.

എന്നിട്ടുമയാളെ നിങ്ങള്‍
മുഴുവന്‍ പണത്തിന്റെയും
കാവല്‍ക്കാരനെന്നു കരുതുന്നു.

സ്വിച്ചിട്ടാല്‍ രാത്രി മുഴുവന്‍ കത്തി നില്‍ക്കുന്ന
അയാളുടെ ഒരേയൊരു കൂട്ടുകാരനായ
ഈ തെരുവു വിളക്കെന്ന പോലെ
അയാള്‍ ഒരു രാത്രിയിലും ഉറങ്ങിപ്പോകില്ലെന്ന്
നിങ്ങള്‍ ഉറച്ചു വിശ്വസിക്കുന്നു.

അയാള്‍ക്കൊരു വീടുണ്ടെങ്കില്‍
അതിനീ രാത്രിയില്‍
ഒരു കാവല്‍ക്കാരനുണ്ടാകുമോ
എന്നൊരിക്കലും ചിന്തിക്കാറില്ലെങ്കിലും.

No comments:

Post a Comment

Please do post your comments here, friends !