കുഞ്ഞിത്തെരേസ, മിടുക്കി, കിലുങ്ങി വ-
ന്നമ്മുവിനോട് പറഞ്ഞിടുന്നു
മഞ്ഞക്കളറുള്ള ജീപ്പുണ്ട് വീട്ടില്, ഞാ-
നെന്നും കറങ്ങാറുമുണ്ട്, കേട്ടോ.
ഒന്നും പറഞ്ഞീലയമ്മു, അവളെന്തു
ചൊല്ലുവാന് ? വണ്ടികളില്ല വീട്ടില്.
കൊച്ചാമിനക്കുട്ടി, മൊഞ്ചത്തി, ചൊല്ലുന്നു
അമ്മുവേ എല്.ഇ.ഡി യുണ്ട് വീട്ടില്
കാണുമ്പോളൊച്ച കുറയ്ക്കുവാന്, കൂട്ടുവാന്
ഞെക്കുന്ന യന്ത്രവുമുണ്ടവുമുണ്ട് കൂടെ.
മിണ്ടാതെ നില്ക്കയാണമ്മു, അവള്
ടി.വി. കാണുന്നതങ്ങേലെ വീട്ടിലല്ലേ ?
ശ്രീരഞ്ജിനിക്കൊച്ചു കൊഞ്ചുന്നു, കൂട്ടരേ
ഏ.സിയുണ്ടല്ലോ എനിക്കു വീട്ടില്.
ചൂടില് തണുപ്പും, തണുപ്പത്തു ചൂടുമേ-
റ്റങ്ങനെയെന്നുമുറങ്ങുമല്ലോ.
അമ്മുവിന് നാസികത്തുമ്പിലൊരിത്തിരി
ദേഷ്യം തിളച്ചു തുളുമ്പി വന്നു.
തെല്ലുനേരം കഴിഞ്ഞിങ്ങനെയോതിനാള്
"ജീപ്പില്ല, ടിവിയുമില്ല വീട്ടില്,
എങ്കിലും വീടിന്റെ മച്ചിലൊരായിരം
വമ്പന് ചിതലുകളുണ്ട്, പെണ്ണേ."
ഒറ്റച്ചിതല്പ്പുറ്റുമില്ലാത്ത വീട്ടിലെ
കുഞ്ഞുങ്ങളൊക്കെയും മൌനമായി.
കുഞ്ഞിത്തെരേസയും, ശ്രീരഞ്ജിനിക്കൊച്ചു,
മാമിനക്കുഞ്ഞും നിശ്ശബ്ദരായി !
