ഏഴു മുഖങ്ങളുള്ള ഒരു ഇന്നോവ കാര്‍!

നാടിനു വേണ്ടി വീടിനെ മറന്നവന്റെ കാതില്‍
സഹജീവിയുടെ ദുരന്തത്തിന്റെ കള്ളക്കഥയുമായി 
അദൃശ്യ തരംഗങ്ങളായി 
പിടികൊടുക്കാത്ത മരണസന്ദേശം !

മരണം ഏഴു മുഖങ്ങളുള്ള
ഒരു ഇന്നോവ കാറാണെന്ന് 
വിശ്വാസികളും അവിശ്വാസികളുമായ കവികള്‍ 
ഇനി പാടി നടക്കട്ടെ

മദിരയുടെ ലഹരിയ്ക്ക്
നന്മയുടെ ദൈവത്തെക്കാള്‍
മനുഷ്യനെ മയക്കാന്‍ കഴിയുമെന്ന്
ദേവാലയങ്ങളില്‍ ഘോഷിയ്ക്കപ്പെടട്ടെ !

ഒരമ്മയുടെ കണ്ണീരിനും, ഭാര്യയുടെ നൊമ്പരത്തിനും
മക്കളുടെ അരക്ഷിതാവസ്ഥയ്ക്കും 
പ്രത്യയ ശാസ്ത്രങ്ങളില്‍ വിലയില്ലെന്ന്
ഇനിയെങ്കിലും എല്ലാവരും മനസ്സിലാക്കട്ടെ

ഒരു വ്യക്തിയല്ല പാര്‍ട്ടി എന്ന് മനസ്സിലാക്കാത്തവര്‍ 
ഇനിയും ചേരി വിട്ട്
നിസ്സഹായതയുടെ മരണം
ഏറ്റു വാങ്ങട്ടെ 

ഓരോ തുള്ളി മദിരയില്‍ നിന്നും
പൂഴ്ത്തി വയ്ക്കപ്പെട്ട ലക്ഷങ്ങളില്‍ നിന്നും
ഇനിയും മരണ ദൂതന്മാര്‍ 
ഇന്നോവാ കാറുമായി തക്കം പാര്‍ത്തു നടക്കട്ടെ !!